AUSTO

Io so’ nu mese troppo dongiuvanne,

troppo attaccato a ‘e femmene, ‘o ssapite!

Me piace d’’e vvedè tutte scullate,

pirciò lle scippo ‘a cuollo tutt’’e panne!

Pe ‘n terr’a tutt’e spiagge sempe spanno

Carne arrustite ‘e sole, sapurite…

E ll’uommene nne restano ‘mbriacate,

vulessero ca i’ stesse tutto ll’anno.

‘O campagnuolo sempe me vulesse.

‘O ssape ca d’’o sole so’ ruffiano,

qualunque cosa ‘o cerco, chello avesse.

I’ ‘o metto cu na vergine ch’è stella,

se ‘nfoca ampresso ampresso, nun va chiano,

ammaturanno tutt’’a frutta bella!

                                                              Vincenzo Internatini

                                                            PASQUALE GALANTE

Da ACENE D’ORO

Ed. La Floridiana

Napoli 1956