‘E PPAGGINE CCHIU’ BELLE

Quanno facevo ‘e cclasse elementare,

ogni quaderno nuovo ca ngignavo:

che sfizio, che piacere che pruvavo

quanno scrivevo ‘ncopp’o primmo foglio!

Accumminciavo chella pagginetta

Cu tanta attenzione tant’impegno

Comme si aveva a fa’ quacche disegno

O quacche quadro, oppure nu progetto.

Durava ‘sta scrittura dduje, tre ghiuorne,

po’ accumminciavo a fa nu sacco ‘e nguacchie

pupazze, scarabbocchie e mille macchie

e ce tiravo quase tutt’’e foglie…

E ne facevo varchetelle, botte,

silure, aeroplane, paparelle…

e me spassavo cu sti pazzielle

cu ‘a gioia ca se prova a chella età.

‘A nu quaderno duppio cchiù ‘e nu dito,

restava ‘a fuderina maltrattata

e ‘a dinto quacche paggina stracciata

e quacche foglio bianco…mai ngignato…

Chi sa’ pecchè ricordo certi ccose?

Pecchè torna luntano ‘a fantasia?

Forse sarrà pecchè ‘sta vita mia

A passo lento, va verso ‘o tramonto.

E pare nu quaderno assottigliato

P’’e troppo foglie ca se so’ tirate…

Chill’ati poche ca ce so’ restate

Ormai ce scrivo cu ‘na mano esperta,

tutt’ordinato, senza fa’ na macchia,

ma…e foglie ca facevo ‘e pazzielle:

silure, botte, varche, paparelle

so’ state certo ‘e pagine cchiù belle.

UGO IZZOLINO

Da POETICA NAPOLETANA FINE NOVECENTO

Ed.Ferraro- Napoli- 1987