|
|
|
|
All'ombra del Vesuvio
Enrico Pastore rubrica a cura di Luciano Somma
|
|
‘A PERIODICA
Cavaliere Pappacone; Cristalline, trentasette; (nu palazzo c’o lampione) Che scupune, che tressette! Ma ‘a “periodica” era ‘o fforte; nu salotto d’antenate; m’arricordo ‘o pianefforte cu tre taste cunzumate. Nu divano scianghinato, “ottuciento” stile puro; n’auciello ‘mbarzamato; sciabulune ‘n facci’’o muro. E me passeno p’’a mente Certi tipe nceruttate: Donna Lisa, Don Clemente; nubilune…sfrantummate! Nun mancava l’orecchista, n’elegante Maria Schisa, Don Arturo ‘o macchiettista; ca faceva schiattà ‘e risa. E pur’io- lo spensierato – Jevo a ffa ‘o conquistatore, quasi sempe innamorato, a giurare eterno ammore! E che “giochi di famiglia”; in francese Pappacone comandava la quatriglia cu na voce ‘e nu trombone. Cotigliò, declamazioni; danze, piezze a quattro mani; che sserate, che veglioni… se faceva ll’indomani! S’era allora al “novantotto” Giuventù, tiempe felice… Addò sta chillu salotto… Addò stanno chill’amice? Veco ancora a tte: Cunziglia, cunzigliarme chistu core! E abballanno na quadriglia Ce mèttevemo a ffa ‘ammore! Ire bella cchiù ‘e na rosa: diciott’anne, primm’ammore! Mo t’astregno, cara sposa, vicchiarella ncopp’’o core!
ENRICO PASTORE
Da ACENE D’ORO Ed.La Floridana- Napoli- 1956 |
Enrico Pastore
Nacque a Napoli il 1 marzo 1904, poeta e pittore. Come pittore fu allievo di moltissimi maestri, militò nel giornalismo e fu un precursore dell’adattamento ritmico indispensabile per poter far diventare i versi In canzoni. |
|
|
|
