Embè i' nun capisco, tutte l’anne

pecchè t’aggia vede’ a ppucundrìa

stu brivido ‘int’’e rine fino abbascio

c’haje voglia a t’arrugna’ ma nun te passa

Tra poco è mezanotte e me ne vaco

ma nun me spiego 'e llacreme ‘int’all’uocchie.

Te fa piacere? Te fa malincunìa?

pecchè stasera ‘o core nun risponne?

So’ sulo nummero ‘ncopp’’o calannario

Dicembre scritto ‘ncapo e 'o juorno 'a sotto

te faccio specie ‘o ssaccio, songo l’urdemo

ma ‘o tiempo, dint’all’anema, è tutt’uno!