 |
Io tengo na mugliera assaje apprensiva
‘a quanno ha saputo ca tengo quacche malanno,
mmo nun me f ’assaggià cchiù manco n’auliva...
guaje a mme si me vede ca stò magnanno!
Me dice: Ma io ‘o ffaccio pe’ te ammore mio!
Sarrà pure overo ma mica pozzo murì...
‘O magnà ca me fà nun è cchiù sapurito
j’ che schifo m’ ‘o ffà sempe cchiù ‘nzipito!
Muglierema è peggio ‘e na carabbiniera
stà c’‘a cucchiarella mano si fa ‘a pastiera,
e si ‘ncopp’ ‘a tavola ce stà na bella torta
chella fà ‘a spia ‘a dint’ ‘o buco d’ ‘a porta.
Po’ a siente e alluccà cu tutta ‘a voce...
T’hanno accidere... lassa sta ‘o doce,
tieni ‘o diabbete, ‘o zzuccaro te costa caro
pe’ te è nu veleno...è nu veleno amaro!
C’aggia dì me vò bbene ‘sta vota tene raggione..
e sotto sotto si ‘o ffà penza pure ‘a penzione.
Quanno ‘o miereco lle dicette : S’ha ddà rassignà
‘o marito vuosto ‘o zzuccaro se l’ha ddà scurdà!
Duttò e chist’ è ‘o prublema? Lassate fa a mme!
E chisto è stato ‘o guajo cchiù gruosso pe’ mme!
L’atu juorno stevo accasciato ‘ncopp ‘a pultrona
me stevo sentenno pe’ radio accussì na canzona....
Quanno muglierema arrevutaje tutt’‘o palazzo..
Tiene ‘o diabete! Alluccava comm’è na pazza
Chistu cantante se chiamma *Zucchero! Animale!
Stuta ‘a radio! Ha ditto ‘o miereco ‘o zzuccaro te fa male! |