 |
Chisa
chi artista d’ ‘a cucina
Se scetaje na bella matina
E chianu chiano se mettette
E ‘nventaje ‘e ppurpette:
‘A carne macenata
nu poco‘e pane spugnato,
doje ove… che saccio
na passata ‘e furmaggio,
nu pucurillo ‘e prutesino
e nu pizzeco ‘e sale fino,
e doje belle mane p’‘e ‘mpastà
e accussì jesce fore ‘a purpetta!
Na cosa assaje sfezziosa
ca te ‘mprufuma ‘a casa,
se po’ magnà c’‘a sarza o fritta,
oppure t’‘a porte miez’‘o ppane
pe’ marenna che friarielle!
‘A purpetta ‘a cchiù piccerella
se mette dint’‘a lasagna…
è ‘a primma cosa ca te magne!
Nun ce stà niente ‘a fà...
è na cosa cchiù forte ‘e me,
quanno mamma mia
‘e ppurpette stà frienno…
una me l’aggia sempe arrubbà;
e m’‘a magno aummo aummo,
zitto zitto e chianu chiano
comm’è nu mariunciello…
pure sì è cucente e me jesce
‘o fummo ‘a vocca! C’aggia fa!
Pecchè si essa se n’ addona
comm’è na pazza se mette alluccà! |